早排睇完一大堆頒獎禮，本年度我最鐘意嘅歌曲《張敬軒—百年樹木》奪得多個大獎，真係好開心！不過喺《百年樹木》呢個咁虐心嘅故事背後，除咗有《櫻花樹下》作為前傳，其實仲有兩套續集，分別係《歲月靜好》同埋《裝睡的情人》。
登入 瀏覽本網站，可獲取積分換領專屬優惠
點擊查看專屬優惠
裝情的睡人，呢個名改得幾有意思。除咗對應「假裝我已睡覺，驚你神情內疚」呢句歌詞之外，更加係講緊一個老生常談嘅話題：「你永遠都叫不醒裝睡的人」裝睡嘅人，可以係你，可以係我，可以係任何人；不過此時此刻，未必真係有其他人嚟叫醒你，反而可能係你明明可以叫醒自己，但又繼續沉迷於美夢之中
故事入面，陳智燊飾演嘅Bob (by the way 呢個名真係好難聽好難聽好難聽，我好想丟佢落山) 陪同廖子妤飾演嘅芳芳參加校友會周年Party期間，發現老婆原來一直記掛舊男友。此刻嘅衝擊，令Bob陷入人生抉擇。如果好好裝睡，仍可幸福微笑；如果狠心叫醒自己，兩敗俱傷。
講到底，無論你表面上有幾多伴侶、SP，人心始終都係肉造，冇可能容納太多人喺裡面。大部人都有情感，但當情感滿溢嘅時候，身邊卻未必係你最愛嘅人；暫時借取他人溫暖，用來投射自己嘅情感需要，成為今日都市人可悲而且常見嘅生態。
「我是一個臨記可以填滿你寂寞，姑息你濫用我彌補這空檔」
人地話，十七八歲時候嘅戀愛往往都係最純潔、最真誠。但我哋總係喺最冇能力作出承諾嘅時候，遇上最想照顧一生嘅人。因為種種原因，最愛嘅人無奈分開；輾轉之下，幾經辛苦先熬到有能力照顧他人嘅年紀。
可能係社會嘅壓力、可能係父母嘅威逼，更可能係源於自身嘅空虛。為咗尋找感情寄托，一對剛好到達適婚年齡嘅男女，陰差陽錯之下走埋一齊。無論係浦鉻心同藍定凌，抑或係Dahlia同Bob，大家都走唔出呢一場情感嘅羅生門。
「一起無言以對如常去相親相愛是哲學，切勿誠實交往」
立即訂閱接收Cosmo最新潮流資訊
訂閱電子報，獲得更多資訊、體驗及禮遇