雖然話愛情係盲目、唔需要理由。不過無論係唔係做情侶，就算係普通朋友都好，唔多唔少都需要有少少共同興趣，先能夠繼續溝通、互相了解。
登入 瀏覽本網站，可獲取積分換領專屬優惠
點擊查看專屬優惠
正所謂熱戀係一時，人嘅本質先係一世。熱戀嘅時候，即使兩個人嘅興趣南轅北轍，但唔知點解總係一時鬼遮眼，完全睇唔到呢啲問題（其實科學係有得解，但講得太scientific就唔浪漫）。結果大家就可以暫且無視問題，努力啜啜啜、啪啪啪。
到後來，再熾熱嘅戀火（或慾火）都會有冷卻嘅一日。要維持溝通，亦唔可能一味用啪啪聲或身體語言解決。呢個時候，共同興趣嘅重要性就會開始顯現出嚟。
就算大家興趣唔係完全一樣，但都需要有交匯點。透過種種興趣，兩個人之間先可以發展出更多共同話題，例如：
男友鐘意聽Jazz、女友鐘意聽Country Music；
男友鐘意踢足球、女友鐘意打羽毛球；
男友鐘意睇科幻小說、女友鐘意睇愛情小品。
雖然咸魚青菜各有所好，基於大家相處之間有相似嘅話題，可以藉此了解對方嘅喜好，從而擴闊彼此生活圈子，亦可學習更多新嘅人同事。
試諗吓，如果你男朋友好鐘意玩音樂，但你自己就十年都唔聽一次歌，咁又邊有話題講落去呢？假設你好鐘意文學或寫文章，但你嘅伴侶從來唔睇書、甚至完全唔想接觸文字，咁樣嘅生活又何嘗唔煎熬呢？
然而比起唔同興趣，更難搞嘅係：有啲人根本冇為自己Develop過任何興趣。當科技越來越發達，越發現身邊有好多朋友每日除咗碌IG、Snapchat之外，其實人生根本冇一項真心想發展嘅活動。就算得閒報下course、報下運動班，都只係一時興起填充時間嘅活動，人玩佢又玩。一旦有拖拍，成個世界就寄托喺對方身上；一旦冇拖拍，世界就好似瞬間崩塌。
所以為自己幸福著想，各位女士記得為自己發掘多啲興趣喇！
立即訂閱接收Cosmo最新潮流資訊
訂閱電子報，獲得更多資訊、體驗及禮遇