古天樂？有啲人會話「咩戲都有佢咁，好濫拍」，又或者有人會話「做咩角色都係做自己咁…勤力囉但演技一般」。
係㗎，因為古天樂成日都出現，我哋好少諗「冇咗佢會點」。
登入 瀏覽本網站，可獲取積分換領專屬優惠
點擊查看專屬優惠
我諗大家都知，古天樂除咗演員，旗下仲有《天下一電影》，投資同製作唔同電影。
喺呢個世道，講到尾，賺錢嘅一定係商業片。咩係商業片？
即係《賭城風雲》，大卡士，劇情冇咩，輕輕鬆鬆，任佢影評一般，都會大收。
古天樂當然有投資同演出商業片，但同時，佢都拍咗好多非商業片，
為人熟知嘅《五個小孩的校長》，嚟緊有姜皓文擔正嘅《翠絲》，探討變性人話題。
非商業片，要大收好難，《五》係一個令人鼓舞嘅結果，
但更多會好似《藍天白雲》、《大樂師．為愛配樂》，
劇情明明唔錯，有命題有構思，但票房一般，甚至不如人意。
係㗎，如果你只為搵錢，絕對可以做得很盡，可以咩都商業。
但佢冇。來年佢投資底下，仲有好多劇情片，好多有營養嘅電影，亦起用唔少新人。
到前兩日，睇埋《明日戰記》嘅trailer。
聽到好多朋友討論，當然仲有啲人會講「有4億我都拍到啦。」
我真係同佢講一句「你有4億你真係敢拍？」
搵到4億嘅投資額，你有好多選擇。
點解要all-in，去拍一套想挑戰荷里活嘅電影？
呢1分鐘trailer，係令人好有希望，
因為啲嘢真係國際級數，香港近年少見嘅大製作，
而且大部分都仲係我哋熟悉嘅演員。
一個人，唔鍾意電影，點會做到呢個程度？
一個人，要幾鍾意電影，先會做到呢個程度？
最近，佢第一次喺「亞洲電影大獎」奪得「最佳男主角」，見到好多人都戥佢開心。
你可能話佢做戲未夠好，但佢一定鍾意做戲，佢一定好勤力去做戲，咁已經好難得。
所以每一次，聽到人講「香港嚟嚟去去都係 古天樂、劉青雲」嘅時候，
要明白香港影壇屬青黃不接，
有其他人上緊，但都需要時間。
呢段艱難時間，與其話「成日係佢哋」，不如話「靠佢哋頂住」。
所以當我一諗「如果影壇冇咗古天樂」，
我就覺得「好在仲有古天樂」。
佢未必係最好，但至少用心。
呢個年頭，仲會醉心於香港電影的，也是應該珍惜的。
立即訂閱接收Cosmo最新潮流資訊
訂閱電子報，獲得更多資訊、體驗及禮遇