話說尋日食Lunch嘅時候，心血來潮打開Youtube想聽音樂，機緣巧合之下居然撳出咗Supper Moment嘅《最後晚餐 (acoustic version)》出嚟。睇到重新編曲配上同Disney•Pixar合作嘅新版MV，忍唔住睇到眼濕濕，趁住放工時間，立刻將《沖天救兵》重新再睇一次。
登入 瀏覽本網站，可獲取積分換領專屬優惠
點擊查看專屬優惠
《沖天救兵》表面上係一套卡通片：識飛嘅屋仔、識講嘢嘅戇狗狗，相信小朋友一定睇得好開心。但如果有返咁上下年紀，曾經擁有過、深愛過、失去過，你可能已經喊到收唔到聲。
故事一開始，講述Carl伯伯小時候同老婆Ellie認識嘅點滴：大家都有同樣嘅興趣、同樣嘅夢想，希望有生之年可以一齊去天堂瀑布探險。就好似我哋年輕熱戀嘅時候，對愛情有好多憧憬，仲未知道咩叫責任、下巴輕輕就許下好多承諾：一齊出走去旅行、一齊開Cafe、生一隊足球隊......然後一齊到老。
年輕嘅時候大家只有夢想，尚未需要為未來憂愁。隨著年月過去，我哋都好似Carl同Ellie一樣，要買車供樓、為生活放下曾經嘅夢想。昔日嘅甜蜜承諾，竟然變成他日嘅遺憾。
Carl同Ellie一日一日老去，Carl突然醒起年輕時嘅夢想，終於買好機票諗住同Ellie去一次終極探險，但年邁嘅Ellie已經臥病不起，不久離開人世。之後嘅故事大家都知，Carl用氫氣球升起屋仔，然後同肥仔Russell飛去天堂瀑布，打算完成Ellie嘅遺願。歷險過程雖然有趣，但終究打唔進人心，都係留返畀小朋友笑下算，在此不再詳述。
反而比較深刻嘅位，係Carl到達天堂瀑布之後，心裡反而湧現一陣空虛感。目標已經達成，但然後呢？最愛嘅人已經唔喺身邊，咁仲算唔算完成夢想？此時此刻，Carl打開Ellie留低嘅Adventure Book，發現原本用嚟撰寫探險日記嘅空白頁，全部都已經貼上兩夫妻嘅生活點滴，答案已經揭曉。
原來對Ellie嚟講，所謂嘅探險、天堂瀑布都一早已經唔再重要。真正嘅旅程，莫過於搵到一個自己鍾愛嘅人，然後一齊踏實生活、實在咁度過每一日。原來只要同愛人好好生活，夢想已經喺默默之中，一步一步地實踐，只係我哋仲未有足夠歷練去了解、去證明一份愛。少啲埋怨對方冇錢同你旅行，少啲追究對方冇趁特價買手袋畀你，好好愛惜肯為你著想嘅人已係最重要。
Ellie喺最後一頁，特別感謝Carl帶畀佢一段精彩人生旅程；呢下猶如當頭棒喝，我哋每日用咗幾多時間沉醉於回憶？用咗幾多光陰去幻想追唔返嘅往事？過去嘅人雖然唔想忘記，但總唔能夠為守護回憶而封閉未來。
最後一個深刻位，係肥仔Russell嘅一句對白：「不知道為什麼，最後記得的都是些無聊的事」無論對未來有幾多憧憬、夢想有幾高幾遠，生活始終係踏實嘅。就算你鐘意旅行、行山，但每日始終都要買餸煮飯、洗衫打掃......仲有好多生活上所謂嘅無聊事。所以，與其懊惱生活阻礙夢想，不如先珍惜嗰個願意犧牲自己時間，去為你做無聊嘢嘅人。
「人無法走過每天，為求沒有帶著遺憾活到終點。」
立即訂閱接收Cosmo最新潮流資訊
訂閱電子報，獲得更多資訊、體驗及禮遇