王貽興專欄：男女間的勞資糾紛

新聞謂窮到燶肥佬扮成有錢人，騙財騙色，竟至少有24個女生中招，當中不乏樣貌高質、條件甚佳的美女……

原來即使其貌不揚，又肥又醜，只要像這條肥老千那樣，租住酒店服務式住宅或者豪宅，衣著光鮮，出手闊綽，就能媾到一輩子原本都媾不到的女，甚至又食又拎，從她們身上騙去至少十幾廿萬，回本之餘仲有錢落袋。有人很同情苦主，但亦有人不屑，只因裏面有些女生都是想釣金龜騙錢，說到尾不過是高手過招，強中自有強中手而已。

 

每當遇到這些爾虞我詐、你奸我都唔蠢得哂，甚至各自理虧的情況，網民都會以一句「勞資糾紛」作結。你因為貪錢結果騙錢不成反被騙，又或者想騙對方錢最後卻賠了身體又貼了仔，都只能說是魔高一丈，黑吃黑，沒什麼好呼冤，也別裝無辜扮可憐，你不貪，誰能騙你？

 

如果你說這樣想很沒同情心，那為什麼當有宅男誤墮交友app陷阱被騙錢，或者早前飯托事件被人呃，我們會笑這些男人活該抵死？如果真要說，這些男人不過是感情空虛寂寞，才讓人有機可乘，但這次騙案裡的女生們，卻是因為貪人家有錢才出事，你話對方冇錢都一樣盅個頭埋去就話真愛啫，你見人地咁有錢所以先主動獻身，人地要你身體要你錢，你都lur飯應，咁又有咩值得同情呢？

 

當社會上越來越女生見高拜見低踩，勢利咁只對有錢男人獻媚，最後只會造就更多醜男毒L充大頭鬼，扮有錢人呃女呃錢呃蝦條，正如當所有男人都愛大胸女子，身材稍差一點都無人問津孤獨終老的時候，所有女人一定會裝假狗，引發升球大墊，就會碌卡借錢節衣縮食甚至打劫銀行，都一定要隆胸，也是同樣道理……你以為世風日下，搵食艱難？往後日子，只會越來越可怕。