兩人先到意大利羅馬，睇完古蹟建築，再去希臘米科諾斯(Míkonos)及聖托里尼(Santorini)同陽光玩遊戲。
Yumiko大爆老公影相咁叻全因自己的功勞：「我不停同佢講，你影相真係好靚，好有天份… 所以，呃佢幫我影咗好多相。#男人是需要鼓勵的 #我目的已達到」，各位女生要學學呢招喇！
今次旅行，老公梁學儲擔任Yumiko私人攝影師，大影靚相。估唔到喺老公的影相技巧叻過唔少男人，喺佢嘅鏡頭下，Yumiko無論近鏡定全身相都咁有女人味。
梁學儲其中一張作品，高度表揚自己話：「我覺得我影相唔差......」惹來老婆Yumiko留言：「都要有個好model嘅」網上大耍花槍，情趣十足！
難得二人行，點少得水上活動？穿上泳衣的Yumiko只分享top shot，性感照睇嚟只留俾另一半欣賞。
梁學儲更快速剪片分享老婆在聖托里尼(Santorini)戲水的性感片段。
Yumiko更話，今次旅行唔洗抱梁浸浸，可以放心著吊帶裙，唔怕被扯爛！
過往幾次旅行，女兒梁浸浸都一定跟埋去，好似3月去日本白馬村滑雪，正是梁浸浸人生第一次玩雪！當時Yumiko和好姊妹黃伊汶(Emme)兩家人一齊帶埋陳真同梁浸浸出發！
5月時，Yumiko同梁浸浸又去美國加州；6月再去中國萬里長城，差唔多每個月都有旅行，真係好幸福。今次無囡囡份，唔知梁浸浸有無扭計呢？