解構6位內雙眼皮韓國女星妝容！

好多女生都希望自己擁有大眼睛、雙眼皮，不過就算唔係雙眼皮都唔代表唔靚，就好似以下6位韓國女星，佢哋雖然天生擁有內雙眼皮，不過只要識得化妝，都可以打造迷人嘅電眼，一齊睇吓佢哋嘅妝容啦！

1. 秀智@ Miss A

被稱為「國民初戀」嘅秀智，人氣有幾勁相信大家都知，平日嘅妝容亦算簡單，唔會搽好多眼影，只係畫一條幼幼嘅黑色上眼線，然後搽上睫毛液，根根分明嘅眼睫毛能夠突出眼形，加埋自然嘅大眼con，清清地都好靚。

2. Hani @EXID

Hani因為《Up and Down》呢首歌而人氣爆燈，更被封為新一代女神。Hani時不時喺Instagram post自己嘅素顏照益fans。平日鍾意用啡色眼影打造深邃眼窩，配上一條幼黑上眼線及搽上睫毛液（有時都會貼假眼睫毛）， 唇妝多數都用粉紅或橙紅色調，加埋其招牌空氣瀏海，女神妝就誕生喇！

3. 太妍@少女時代

太妍嘅雙眼較圓，眼皮亦內摺得嚴重，所以會先喺眼窩上掃一層金色眼影，眼皮位置用金啡色眼影，再貼上雙眼皮膠紙/膠水及假眼睫毛。而近日嘅妝容，就係喺下眼睫毛上貼上一束束假睫，令雙眼更大，更具型格味道。

4. CL@2ne1

CL本身擁有小眼睛，為打造型格感，平日嘅眼妝都偏向誇張路線，以smoky eyes再配上黑色粗身貓眼線及濃密假眼睫毛，徹底地將眼睛放大兩倍（以上？）。雖然喺香港咁樣化可能有啲over咗，不過大家亦可以化返個輕量版CL型格妝，去party都好啱架！

5. Krystal @ f(x)

 

Krystal嘅內雙眼皮稍為厚重，雙眼容易望落無神。平日Krystal妝容亦算簡潔，以啡金眼影為眼妝重點，輕輕加一條黑眼上眼線及搽上眼睫毛，最後用珠光色眼影加喺卧蠶位置，感覺清新又可愛。

6.  宋慧喬
 

被稱為「天然美女」嘅宋慧喬，天生係美人胚子，無論素顏定濃妝都咁靚。不過宋慧喬最常以裸妝示人，眼妝方面，但好多時只畫一條上黑色內眼線，配上自然又根根分明嘅上眼睫毛，眼影亦非常輕手，下眼位置亦唔會特別化，最多都係掃幾下睫毛液，天然美女果然唔係浪得虛名！