【真人真事】身兼多職處理夫婦、婆媳、親子關係 Debby：少啲EQ都唔得，但一家人最緊要包容。

與老公拍拖3年，在26歲時選擇結婚，談起當初結婚細節，Debby 笑著坦言：「其實係我主動提出早啲結婚。」Debby和Kison本身都鍾意小朋友，所以在拍拖之初已開始謀劃將來，而Kison的重家庭和上進更讓Debby早早認定Kison就是自己的Mr Right，奈何就現實上金錢的問題，成了兩人組織家庭的最大憂慮，Kison：「當拍拖到第三年準備組織家庭時，我覺得仲未儲夠錢去滿足我哋未來想生三個小朋友嘅計劃，我想做足準備俾Debby一個無太多後顧之憂嘅婚姻。」

但作為太太的Debby，反而對錢沒太多顧慮：「婚姻就是兩個人共同面對未來嘅課題，未儲夠錢唔緊要，婚後可以兩個人一齊行，共同努力。」Debby時至今日回憶當初主動提出結婚的決定時，依然語氣溫柔而堅定。

當初結婚的決定都沒錯，因為當問及兩人由拍拖到結婚最甜蜜的時刻，兩人都輕易想到答案，Debby：「我第一時間回憶起就係求婚時刻，佢知道我鍾意美國隊長，佢就夾埋我嘅朋友，一齊著曬Marvel衫喺銅鑼灣行人專用區同我求婚，真係好Surprised 好sweet。」

Kison：「我覺得最甜蜜嘅時刻係Debby話我知我哋將會有第一個BB嘅時候，嗰陣時我做緊野，Debby打視像電話俾我，話俾我聽我地有小朋友啦，嗰一刻我地互相望住對方，好開心咁流眼淚，真係永遠唔會唔記得。」

縱使四周充斥著三個小朋友的玩鬧聲，Debby聽完老公的答案都微微哽咽：「佢提返我，嗰個畫面我都好深刻，但唔知點解第一下諗起嘅就係求婚，女人可能真係比較膚淺啲。」

Debby明白處理婆媳關係的核心在於老公，所以也有曾經嘗試跟老公溝通，希望老公能成為她和奶奶之間的橋樑：「教識老公主動與家人溝通好緊要，畢竟對於老公家人嚟講，老公嘅意見會比較容易接受。」不過，老公都不是那種一點就明的人，Debby笑言要慢慢調教：「有時你同老公呻一啲問題，佢地並唔會在意，但當問題積聚，你要爆的時候又會被說平時你唔講，一下就爆。」去到一個難以溝通的地步時，氣話也是無法避免的：「我有同佢講過，如果生活得唔開心會影響到夫妻感情，如果唔解決，可能就需要分開㗎喇。」Kison才赫然意識到問題的重要性，主動協調家人關係。

Debby除了與老公認真溝通外，也得出了能跟奶奶成功溝通的獨門秘技——循序漸進：「同奶奶交流有時要好似對小朋友咁，要有耐性，唔可以一下子話你唔可以咁做，而係要講道理，話俾奶奶知咁樣做對小朋友成長嘅影響。」當然，奶奶本身亦希望孫仔可以健康成長，所以慢慢也會接受。Debby能找出最有效的溝通方法之餘，也發現包容與耐性都不可缺少：「我都結婚7年啦，好多嘢要俾時間大家相處磨合同改變。」現在，婆婆每日打麻將的習慣變成只有在週末才偶爾玩樂，恐怖片亦不會在小朋友面前觀看，算是很成功的循序漸進結果。

工作與家庭對於好多人來說是個選擇題，埋頭工作就要忽略了家庭，亦很容易將家庭重擔交給另一半，但對Debby來說兩者其實是個分配題：「我會用『3-3-1』的時間分配法，三日時間陪小朋友，三日時間工作，一日時間就留俾自己或自己和老公拍拖。」

即使身兼多職，Debby強調私人時間以及老公拍拖的時間是非常重要，因為這才能從緊繃的生活中帶來一個自我休息療癒的空間及時間，而且也是讓夫婦感情保溫的好方法，Debby：「切忌將所有心思俾哂小朋友，咁樣有機會造成自己心理不平衡。要時刻記住，你同老公係伴侶嘅角色，不能因為擔當父母嘅角色後而有所忽略。其實有時至少叫屋企人幫手睇住小朋友，同老公一齊出去食餐飯都可以令感情保溫。」

對於兼顧工作與家庭，Debby覺得最重要的是接受自己的不完美：「以前好完美主義，每一樣事都要做得完美先滿意，但其實你會慢慢發現，完美主義會俾自己好多壓力，做唔到完美會導致自己直接選擇放棄。接受自己嘅不完美，有時做到7-8分已經足夠。」誠然，放下一些對自己較高的準則，會令到各方面的事情得到平衡，以不完美造就最大的完美。