Long Distance就要分手？

要睇吓點解要Long Distance同分開幾耐？始終兩個人嘅感情，無可能永遠單靠skype同facetime維繫，真人面對面嘅交流都好重要。如果係因為移民，之後無諗過返嚟，又或者長時間派駐外地工作，要去成三五七年，唔知幾時返，除非有好堅定嘅感情，或者大家已經plan之後會一齊生活（其中一方搬過去／對方會返嚟），否則都要有心理準備好難keep。至於短期嘅Long Distance，例如係幾個月嘅exchange、1年嘅working holiday，只要有心維繫，都唔需要太擔心，反而「小別勝新婚」，可能感情會更好添！

 

 

 

如果雙方都決定要實行Long Distance，就要傾吓呢段時間大家點樣聯繫感情。除非交通好方便，否則都好難成日見到面。大家要商量吓，傾一個大家都覺得可行嘅方案，例如隔日傾電話、半年內見一次面等等，令大家安心。除此之外，不妨得閒俾啲sweet小驚喜對方，例如速遞一份親手整嘅禮物，氹下對方開心。

 

除咗分析種種客觀因素，當然你哋亦都要問下自己內心，對呢段異地戀情有信心嗎？少少不安感係正常嘅，但如果一開始（甚至未開始）你已經充滿疑心，即使無事發生都一樣會捕風捉影，最後鬧分手亦唔出奇。先平心靜氣講出大家心中嘅不安，再諗辦法去解決。記住，如果未正式分開都已經無信心維繫，戀情都好難開花結果。