9款綠茶食品試食報告!

by TEXT : 韋寶

我對綠茶嘅鍾愛程度,係每次見到綠茶味嘅食品都會忍唔住買,所以朋友每次去完日本 / 台灣 / 韓國,都會為我帶來即沖的綠茶牛奶!另外,由於我身邊的綠茶控也不少,所以今次就為大家送上呢個綠茶食品試食報告!

日式綠茶曲奇 / (8片裝 / $95、18片裝 / $210、32片裝 / $360)

綠茶味指數:★★★★☆
好味指數:★★★★☆(四星半)
總評:呢個禮盒入面有兩款曲奇,包括白朱古力綠茶同特濃純朱古力,兩款都又香又鬆脆,而且甜度剛好,內裏嘅綠茶夾心仲好幼滑,食完好想再食呀!

銷售點:Godiva(供應時間至三月)

和泉屋片裝綠茶味蜂蜜蛋糕  /  $64

綠茶味指數:★★☆☆☆(兩星半)
好味指數:★★★☆☆
總評: 一開包裝袋,綠茶香氣撲鼻而來!點知一食落口,只有蜂蜜蛋糕嘅味道,不過質感就幾鬆軟!另外,由於它是長崎蛋糕,所以底部會有一些砂糖。有同事食完話好味,不過我就覺得整體偏甜,因而拖低了好味指數。
 
銷售點: city’super 


抹茶幻想曲 / $45
 
綠茶味指數:★★☆☆☆
好味指數:★★★☆☆
總評:呢個蛋糕賣相吸引,一見到就覺得味道會好「綠茶」,不過食落無乜綠茶味,係奶油蛋糕嘅味道。就咁食面嗰一浸,才有少少綠茶味。
 
銷售點:Patisserie Yamakawa(city’super)



抹茶田園豆腐奶昔  /  $38
 
綠茶味指數:★★★☆☆
好味指數:★★★★☆
總評:用上北海道牛奶製作,味道像green tea latte,不過質感較濃稠。由於加入了滑溜溜的豆腐,所以增添了一份清新的感覺!同類型飲品仲有雲呢拿豆腐奶昔,這個的味道與豆腐更夾,不過身為綠茶控嘅我,都係會揀返抹茶奶昔!
 
銷售點:MR. STEAK青衣城店(青敬路33號青衣城地下G03A號舖)

星之抹茶-牛奶綠茶 / $65(7包)
 
綠茶味指數:★★★☆☆
好味指數:★★★☆☆
總評: 味道ok,唔會太甜,飲到綠茶味之餘,飲完亦唔會「漏滯」,不過就無乜奶味。
 
銷售點:city’super 
 
京都抹茶批8件裝 / $75
 
綠茶味指數:★★☆☆☆
好味指數:★★☆☆☆
總評:個名叫抹茶批,但其實係泡芙嚟,質感腍腍哋,偏甜之餘又無乜綠茶味,未至於難食,不過絕對唔會再買嚟食,真係唔明點解佢會叫京都抹茶批。
 
銷售點:零食物語

宇治金時綠茶沙冰 / $30 
 
綠茶味指數:★★★☆☆(三星半)
好味指數:★★★★☆
總評:用上日本綠茶粉製作,入面除咗有紅豆,仲有涼粉同綠茶雪糕,口感豐富,而且味道不錯! 
 
銷售點:甜牙牙(尖沙咀加拿分道46號地下)

樂天紗紗雙味朱古力-抹茶牛奶 / $25.5(69g)
 
綠茶味指數:★★★☆☆
好味指數:★★★☆☆
總評:有綠茶味,不過因為太甜嘅關係,食完兩片已經唔特別想食。(利申:我鍾意食黑朱古力,即唔太甜又濃朱古力味的!)
 
銷售點:759阿信屋


東茶園抹茶豆乳粉 / $50(50g)
 
綠茶味指數:★★☆☆☆
好味指數:★★☆☆☆
總評:包裝好靚,聞落啲豆乳粉都好香綠茶味,不過飲落呢,就無豆乳味亦無綠茶味,只飲到少許苦澀味……
 
銷售點: city’super 

 

LOAD MORE