3招應付無禮同事！

講嘢倔、講咗啲嘢搞到你好尷尬、一時唔知點應好嘅同事，有時真係可以令人谷氣足一日，既嬲佢哋無禮貌，又嬲自己當時唔識反應！唔好嬲壞自己，呢啲事人人都遇過，不妨而家開始袋定幾個有用嘅回應落袋，到時就識得反應啦！

處境1

都過咗放工時間喇，你攞手袋準備放工，有人一句「得」埋嚟，慌死其他人聽唔到咁：「嘩，你又咁早走呀！」

回敬：

千祈唔好露出狼狽表情，回佢一句唔使佢回應嘅說話，例如「我做晒手上啲嘢喇，聽日見！」然後瀟灑啲攞袋推門出去，唔好俾佢覺得佢影響到你。

處境2 

喺有其他人在場嘅時候，粗聲粗氣話你：「以後嗰啲嗰啲咩，唔該你點點點⋯⋯」

回敬：

同佢鬥粗聲粗氣係無補於事，亦降咗自己格，呢啲情況要採用相反語氣嚟拆解，即係要用勁好語氣答返：「係呀，好呀！咁其他嗰啲嗰啲，我都會提下你，大家互相提醒啦！」

用溫柔回應返粗魯，造成反差，咁你唔會尷尬之餘，仲顯得你大方。

處境3

忽然當你透明人。 好明顯呢位同事係有嘢嬲你，但又唔想講出嚟，所以用行為嚟無聲抗議。

回敬：

趁得你兩個人時，問佢係咪嬲你？為乜？語氣可以輕鬆啲，唔使太嚴肅。俾兩次機會佢，如果佢都係話「無嘢」，就當佢真係無嘢囉，答返佢一句：「咁就好喇！」

然後表現返好似平時咁，當佢細路仔發脾氣，無人理佢，佢自然會回復正常。