editing

女神多人追?其實男仔頭性格女生先受歡迎!

女神多人追?其實男仔頭性格女生先受歡迎!

唔知大家有冇試過,身邊總有一啲朋友好多感情煩惱,每隔幾星期就會俾人追、有人送禮物、同時有兩個男仔Approach搞到唔知點揀......總之佢哋嘅生活圈子就係充滿住狂蜂浪蝶,真係令人羨慕。


明明自己樣貌身材都唔係輸蝕,點解佢就有咁多桃花,自己就長期單身呢

明明自己樣貌身材都唔係輸蝕,點解佢就有咁多桃花,自己就長期單身呢(係呀,明明單身都要被逼聆聽感情煩惱,真係叫人冬天飲雪水)?究竟佢哋有咩特質呢?
細個成為以為化靚靚妝、舉止優雅,再著到成個Lady咁樣,就可以吸引白馬王子嘅目光......完全係錯晒!可能你童年真係睇得太多迪迪尼嘅公主卡通片,斯文的確係優點,但過份斯文就會令人好有距離感。隨住你慢慢大個女,就會發現以前成日俾人取笑麻甩嘅嗰班男人婆,到頭來竟然有最多男仔圍住佢哋轉;相反,你只能夠眼甘甘望住佢哋風流快活。

女神多人追?其實男仔頭性格女生先受歡迎!

男仔頭最大嘅好處,就係可以不知不覺間混進其他女仔難以加入、以男人為主嘅群體。一個男仔頭嘅女仔,可以完全融入男人群嘅生活,飲酒、講粗口呢啲自然不在話下,就連佢哋嘅情史、兄弟關係,你都可以摸得一清二楚。當你成功混入男人群中,由於呢班男人身邊欠缺女生群體,自然就會當你係寶、錫住你、討好你、同你袒誠相對(I mean 著住衫)。當然前題係,你嘅外型依然係一個女人。

女神多人追?其實男仔頭性格女生先受歡迎!

撇除某部份嘅情場精英,其實大部男人都好幼稚;原因好簡單,因為如果係情場精英,一早就唔會留喺呢個男人堆之中覓食。當你成功取得男人們嘅信任,只需偶爾揀幾個人出嚟、單對單食返碟豆腐火腩飯,佢哋分分鐘就會以為自己終於出人頭地,喺一眾(襟)兄弟之中脫穎而出,成功奪得你嘅芳心!當然佢哋唔會知道,其實你同每位兄弟都食過呢碟豆腐火腩飯,不過咁樣又有咩所謂呢?

女神多人追?其實男仔頭性格女生先受歡迎!

只不過,男仔頭性格亦唔係話扮就扮到,如果你天生有張高傲臉......試下吊高嚟賣,都可能有意想不到嘅收獲嘅?

LOAD MORE