editing

感情哲學題:世上究竟有冇真正嘅「原諒」?

感情哲學題:世上究竟有冇真正嘅「原諒」?

「原諒」係一門好玄嘅學問。人生在世,難免有犯錯之時;有時你要尋求人哋原諒,有時候係自己嘗試原諒其他人。


電影《原諒他77次》裡面,Eva(阿Sa飾)為情人Adam(周柏豪飾)設下一條恐怖死線:「我只會原諒你77次,第78次你就自己去食屎啦」。另一方面,早前喺觀塘海濱野戰嘅一對痴男怨女,亦被爆出雙方原來並非情侶,只係女方一時飲醉、慾火焚身之下當眾開戰,向正印男友大派綠帽!所謂「帽唔怕戴,最緊要除得快」,正當大家都以為事主會被碎屍萬段之際,女方表示一早已獲男友接受解釋,並大方原諒埋佢!

喺討論「應唔應該原諒佢」、「點解要原諒佢」等道德問題之前,我哋更應該探討一個大前設:世界是否存在真正嘅「原諒」?

原諒過程中嘅第一步,當然要有人犯錯(你唔錯,我邊有機會寬宏大量原諒你呀?)。姑勿論對方係真犯錯,抑或只係你覺得佢做錯,總之就係錯啦!當其他人觸犯咗你心目中定義為「錯誤」嘅事之後,關係就會出現裂縫。

 

隨住時間流逝,你可能會忘記裂縫,但我唔會稱之為「原諒」,頂多只係記憶力衰退。要證明呢點好簡單:當你再次走過原點、唔小心Trigger到舊記憶,發現傷口依然隱隱作痛,原來裂縫冇消失過。

當關係出現咗裂縫,就嚟到原諒嘅第二步:催眠自己忽視裂縫。好多人會呃自己:「我冇嘢喇喎,而家Overcome咗就Okay晒啦!」傻豬嚟嘅,講得出呢句,即係代表你扮冇嘢。

哲學角度嚟講,唔重要嘅記憶,係唔需要思考去「忘記」,因為事情根本唔值得上心;越想努力「忘記」,即係代表呢件事相當重要、影響十分大。每次嘗試原諒,潛意識中反而更無法原諒,因為呢個錯誤已經刻骨銘心。(相反,當你越努力記住,越容易忘記。例如溫書)。

無論點努力修補、用石屎填返實個窿都好,心裡嘅刺係一世嘅,永遠都拔唔走;只需一個藥引,足以引爆一切。世界上所有嘅原諒,本質上都係一門欺騙自己嘅偽術。

LOAD MORE