editing

《延禧攻略》女一大起底,吳謹言係未來內地電視圈新花旦?

《延禧攻略》女一大起底,吳謹言係未來內地電視圈新花旦?

內地最hit古裝電視劇《延禧攻略》一播出即成為網民熱話,套劇咁精彩,同女主角魏瓔珞相當成功嘅人物塑造有關。事關呢個女主角唔係一般嘅女主角,外表清純,但內裡腹黑,性格強勢,脾氣暴躁,但係又好有正義感。咁有層次感嘅角色當然好受觀眾歡迎。雖然製作人于正起用觀眾唔多熟悉嘅吳謹言嚟擔正做女一,但吳謹言都不負所望將角色演得出神入化。

by COSMO

據說TVB將《延禧攻略》重新加工,增加咗佘詩曼嘅戲份,等觀眾更加好欣賞到阿佘由忠變奸嘅心路歷程。

但其實呢部劇其他演員都好有睇頭,尤其係女主角,由吳謹言演嘅魏瓔珞。

咪以為呢類以女性為題材嘅宮鬥劇,女主角都係傻白甜任人欺凌,呢部劇嘅女主角一出場已經性格剛烈,脾氣暴躁,手段毒辣,一啲都唔好惹。

鬧皇上都敢。

想屈佢食死貓都唔係咁容易。粉絲都要尊稱佢一聲“魏姐”。

女主角魏瓔珞呢個角色都唔係一般演員能勝任。製片人于正就選中新秀吳謹言嚟演呢個角色。

吳謹言巴掌臉配清秀嘅五官,長相非常柔美。于正話,因為覺得吳謹言太過靚女,所以佢要吳謹言將眉毛全部剃走。古裝扮相嘅吳謹言少咗原來嘅溫柔,多咗一分堅毅同霸氣。

女主角原來眉毛粗粗。換成幼眉之後變得更有靈氣,五官辨識度更高。

 

呢個眉毛真係同內地古裝劇慣用嘅一字眉唔同,非常細,造型令觀眾好有新鮮感。而且整個粧面非常清淡,有種少女的俏皮感。

 

吳謹言係1990年出生,畢業於內地著名演藝類大學,北京電影學院,曾經仲係中央芭蕾舞團專業嘅芭蕾舞者。唔怪之得劇中魏瓔珞身姿都咁優美。

 

吳謹言曾經喺唔少電影,電視劇中演過一啲分量唔重嘅角色。但有過咁多接拍戲劇嘅經歷嚟磨煉演技,喺《延禧攻略》中擔正做女主角嘅佢,同咁多好戲之人演對手戲一樣氣場十足。

 

喺《延禧攻略》中吳謹言更係將女主角足智多謀演得活靈活現。女主角唔係淨識得惡嘅,佢都可以好女仔。可以望著傅恒一臉花癡。

扮傻又得。

 

定妝照就顯得楚楚可憐,非常溫柔。

睇完《延禧攻略》好多觀眾一定都會愛上吳謹言演嘅女主角,因為呢種強勢,能幹,甚至唔係幾單純善良嘅女主角真係好少見,而吳謹言秒殺一眾一線花旦嘅精彩演技相信會令佢以後喺影視界一定有更好嘅發展。

LOAD MORE