卷蛋可以話係近年嘅大熱甜品之一，充滿蛋香嘅蛋糕再加上軟滑嘅cream，真係令人食完一件再想食多件！今次我哋試咗7間各有特色嘅卷蛋，快啲一齊嚟睇吓邊間好味又抵食！
- 店舖名稱：La Creation de Gute
竹炭胡麻甜豆卷蛋（價錢：$ 120 /條）
評分（五分滿分）：
忌廉香滑度：★★★☆☆（三星半）
蛋糕鬆軟度：★★★★☆
造型：★★★★☆
抵食度：★★★★☆
整體評分：★★★★☆
總評：一開個盒嗰陣，小編已經聞到好大陣芝麻嘅香味，即刻急不及待要切開嚟食！切嘅時候都感受到蛋糕質感鬆軟，而且個cream都幾滑，可惜啲cream同蛋糕有少少散開嘅感覺。
食落去個卷蛋有好香濃嘅芝麻味，仲可以食到少少芝麻同豆嘅口感，整體嚟講個卷蛋都唔會太甜，味道唔錯！
店舖地址：尖沙咀河內道18號K11購物藝術館B103舖
電話：3122 4168
- 店舖名稱：茶之環Cha-no-wa
抹茶卷蛋（價錢：$ 150 /條）
評分（五分滿分）：
忌廉香滑度：★★★★★
蛋糕鬆軟度：★★★★☆
造型：★★★★☆
抵食度：★★★★☆
整體評分：★★★★☆（四星半）
總評：呢個可以話係抹茶控必食！首先，成件卷蛋嘅抹茶味好濃，而且食得出係好真材實料嘅抹茶味，中間嘅抹茶忌廉都幾滑，唔會好甜，食完仲有少少after taste回甘感覺！雖然佢啲蛋糕軟熟得嚟無回彈力，但啲綠茶cream太好食，食完幸福感up呀！
店舖地址：銅鑼灣勿地臣街1號時代廣場B1 City'super
電話：2917 7213
- 店舖名稱：Roll
豹紋卷蛋──焦糖香蕉及杏仁花生糖味（價錢：$ 180 /條）
士多啤梨卷蛋（價錢：$ 180 /條）
評分（五分滿分）：
忌廉香滑度：★★☆☆☆
蛋糕鬆軟度：★★☆☆☆
造型：★★☆☆☆
抵食度：★☆☆☆☆
整體評分：★★☆☆☆
總評：士多啤梨卷蛋都有蛋嘅香味，可惜蛋糕唔係咁鬆軟，而且同啲cream分離。cream入面嘅士多啤梨亦切得較為細粒，所以食落去口感一般。而卷蛋上嘅圖案落差都幾大，士多啤梨變咗做熒光粉紅色嘅蘿蔔，感覺好似食咗好多色素落肚咁！
至於豹紋卷蛋（焦糖香蕉及杏仁花生糖味），無論聞起嚟定食落去都充滿香濃嘅咖啡味，可能因為小編一直期待呢個會係焦糖味，點知佢嘅咖啡香蓋過咗焦糖味，所以有啲失望。不過如果你鍾意食咖啡味卷蛋同香蕉嘅話，呢款卷蛋會好啱你口味，因為入面係有香蕉肉架！至於佢嘅cream同蛋糕跟士多啤梨卷蛋一樣都係比較鬆散，會同啲cream分離。
整體嚟講，呢兩款卷蛋中以豹紋卷蛋嘅味道較佳，不過兩者上面嘅圖案都較為粗糙，所以小編們都幾失望，加上分量亦唔係特別大份，抵食度只屬一般。
店舖地址：葵芳葵喜街13-29號永恆工業大廈12樓5室
電話：2191 9212
4. Via Tokyo
左：抹茶卷蛋（價錢：$ 40 /件）；右：焙茶卷蛋（價錢：$ 40 /件）
評分（五分滿分）：
忌廉香滑度：★★★★☆
蛋糕鬆軟度：★★★☆☆
造型：★★★★☆
抵食度：★★★☆☆（三星半）
整體評分：★★★★☆
總評：抹茶卷蛋食落都幾重茶味！雖然佢嘅cream未算係最滑，但都不過不失，食落充滿咗茶嘅甘味，但又未去到澀嘅程度，所以食完成件抹茶卷蛋都唔會覺得太甜，不過蛋糕嘅鬆軟度只屬一般。
坊間較少見焙茶口味嘅卷蛋，小編未食已經好想試！食落呢，佢嘅焙茶味係超級濃，嗰種味道係直衝上腦架！至於美中不足係佢啲cream比抹茶卷蛋甜，食完一件後就有少少甜膩感，而且蛋糕嘅鬆軟度同樣都係一般。
店舖地址：銅鑼灣禮頓道106-126號禮信大廈地下1A-1B號舖
電話：2895 1116
- 半島精品店
士多啤梨卷蛋（價錢：$45 /件）
評分（五分滿分）：
忌廉香滑度：★★★★★
蛋糕鬆軟度：★★★★★
造型：★★★★★
抵食度：★★★★☆
整體評分：★★★★★
總評：半島嘅士多啤梨卷蛋一向都好出名，不過講真，食之前我都無好大期望，因為出名嘅都唔一定好好食。不過呢個卷蛋真係實至名歸，我食過之後就成日都要返去「探佢」，因為佢個cream超香滑，但一啲都唔漏、唔甜膩，感覺好輕身，呢種味道同質感都係我第一次食到嘅，至於蛋糕軟熟得嚟仲有蛋香，夾埋香甜嘅士多啤梨真係好正，係小編最愛嘅卷蛋嚟！
店舖地址：尖沙咀彌敦道19-21號半島酒店7-9號舖
電話：2920 2888
- 諾亞半熟蛋糕專門店
京都抹茶鮮乳卷（價錢：$ 88 /條）
原味蜂蜜鮮乳卷（價錢：$ 79 /條）
評分（五分滿分）：
忌廉香滑度：★★☆☆☆
蛋糕鬆軟度：★☆☆☆☆
造型：★★☆☆☆
抵食度：★★☆☆☆
整體評分：★☆☆☆☆（一星半）
總評：喺市面上較少有蜂蜜卷蛋，所以小編喺食之前都好期待。可惜到真係食嘅時候就有啲失望，因為個蛋糕一來唔夠鬆軟，二來又無乜蛋香，而且佢嘅cream較為硬身。此外，佢哋喺cream嘅中央位置加咗啲蜂蜜，不過食落又唔多覺有蜂蜜味。
而京都抹茶鮮乳卷同樣喺卷蛋嘅中間加入少許綠茶cream，雖然食落係有啲綠茶嘅味道，但可惜係人工嗰種綠茶味，加上蛋糕唔夠鬆軟，白色cream又較為硬身，整體都係唔合格。
店舖地址：九龍城衙前圍道64號地下2號舖
電話：2382 6438
- 店舖名稱：Baby Mon Cher Cafe
堂島卷（價錢：$150 /條或 $ 80 /半條）
評分（五分滿分）：
忌廉香滑度：★★★★★
蛋糕鬆軟度：★★★★☆（四星半）
造型：★★★★☆
抵食度：★★★★☆
整體評分：★★★★☆（四星半）
總評：堂島卷係店家嘅「鎮店之寶」，重點當然係中間嘅忌廉，食落真係好香好滑，如果鍾意食cream嘅朋友一定會好鍾意！而且個cream好味得嚟又好light，食完唔會覺得好漏，蛋糕鬆軟得嚟仲有回彈力同蛋香味添！
店舖地址：銅鑼灣軒尼詩道555號崇光百貨B1地庫層
電話：2831 8426
登入 瀏覽文章可賺取積分