素聞半島精品店嘅Strawberry roll好好食，其實除咗士多啤梨，店家仲會推出期間限定嘅egg roll，好似而家嘅檸檬忌廉藍莓卷（Lemon cream and blueberry compote roulade$45、發售日期：即日起至2015年5月底），個cream滑溜非常兼富檸檬香味，喜歡偏酸同清新味道甜品嘅一定鍾意！
至於拿破崙都有限定口味，佢就係紅桑子玫瑰拿破崙（Fresh raspberry mille-feuille with mascarpone and rose cream$45、發售日期：即日起至2015年4月底），清新嘅紅桑子味中夾住淡淡玫瑰香，味道好夾，而且玫瑰味調較得啱啱好，唔會太濃得嚟又食到！而拿破崙本身嘅質地同味道應該唔使我多講，一樣係好好食啊！
至於出名嘅Strawberry Roll我都試咗，的確做得好好：個cream超香滑，但一啲都唔漏，感覺好輕身，呢種味道同質感都係我第一次食到嘅，蛋糕軟熟兼富蛋香，夾埋香甜嘅士多啤梨，本身唔好卷蛋嘅我都覺得好好味！
（如果你好鍾意食卷蛋，仲可以試下宏嘅綠茶卷蛋，詳情：編輯推介：4間必食甜品店！）
我仲試咗呢款朱古力蛋糕，睇個樣好似會好heavy，但食落就一啲都唔係，加上入面有啲果仁，夾埋唔會好甜嘅朱古力蛋糕，同埋蛋糕面嗰啲好香可可味嘅朱古力醬，同樣好good呀！
此外，當日去嘅時候店家已經推出咗復活節嘅產品喇，同埋唔講唔知，呢度有scone set，可以買半島嘅scone返去慢慢歎，而且價錢係$88，真係好抵！
仲有仲有，呢度嘅朱古力棉花糖、半島熊嘅精品同手工朱古力都好吸引，當中手工朱古力真係既好味又特別呀！好似hazelnut lemon咁，小編第一次見呢個combination，食落係榛子朱古力味，但同時有啲檸檬啫喱喺入面，嗰個感覺同味道都好特別！仲有honey味手工朱古力都係，一咬落去蜜糖就湧出嚟，夾埋朱古力嚟食，嗰種得意嘅感覺好難用筆墨形容！由獲得國際獎項嘅朱古力大師所造出嚟嘅朱古力，真係與別不同架！
半島精品店 Peninsula Boutique
地址：尖沙咀彌敦道19-21號半島酒店7-9號舖
登入 瀏覽文章可賺取積分