feature

【紅葉拍攝攻略】跟日本攝影高手拍出超美紅葉照

【紅葉拍攝攻略】跟日本攝影高手拍出超美紅葉照

踏入秋天,天氣開始轉涼,除咗代表大褸同冷衫可以出動之外,都代表又到紅葉滿滿嘅季節喇!日本氣象協會早前公佈咗第一輪2018年嘅紅葉預測,指今年嘅紅葉季大概喺10月下旬就開始,而最早可以睇到紅葉嘅地方係札幌同旭川。

 

如果你心郁郁想去睇紅葉,當然唔少得學識影紅葉嘅拍攝技巧啦,要趁青春留倩影呀嘛!今次小編專程揀咗5個日本攝影高手影紅葉嘅技巧比大家參考,希望會去追紅葉嘅你哋都一定影到靚相!


1. daisukephotography

想影紅葉影得有一種秋意撩人嘅感覺唔一定要成個畫面都係滿滿紅葉嘅!可以學下daisukephotography用留白嘅方法,利用清空嘅道路襯托樹枝上又紅又黃嘅紅葉。

如果略嫌畫面單調,可以襯行人行過嘅時候捕捉畫面。構圖豐富之餘,帶一種蕭瑟寂寞嘅感覺。

2. anbalance_film

另一個可以令紅葉構圖特別嘅方法就係捕捉紅葉間嘅透光,紅葉同紅葉之間透出嘅光就好似一盞自然嘅spotlight,透光同掩蔽嘅地方形成強烈嘅對比。

安排唔同嘅人企喺透光嘅地方下面都會有唔同嘅效果,如果想喺紅葉季節影情侶相嘅朋友仔不妨參考吓呢個做法呀!

3. momoyu1125

講完影景為主嘅拍攝技巧,當然唔少得講影人啦!如果唔想張相出到嚟係一張好悶嘅紅葉人像照嘅話,可以試下運用紅葉嘅陰影。影一張人像close-up,淨係影個頭唔洗影全身,然後周圍都被紅葉包圍,運用紅葉嘅陰影做面上嘅花紋,打破沉悶嘅框框!

另一個方法係運用紅葉間嘅空隙,影出企喺紅葉底下渺小嘅人,構圖出到嚟都相當有趣!

4. naosuke.0c_0.7

紅葉加埋BB都係一個超吸睛嘅組合,喺紅葉底下拍出寶寶自然嘅神態就已經可以影出最可愛同活力嘅相。

但係因為小朋友同BB嘅動作都會比較多,拍攝時記住要調較好快門或者用連拍,確保捕捉到寶寶最得意可愛嘅畫面!

5. halno

Halno 呢個IG account相信好多人都唔陌生,佢嘅「離地」相片曾經熱爆一時。雖然普通人嘅拍攝技巧未必有佢咁勁,但喺紅葉前面跳起影相呢個概念絕對值得參考!

相比起好standard咁企喺紅葉前面影相,跳起呢個方法絕對可以為相片帶黎活力!

LOAD MORE