【全民造星】選秀節目打造全民偶像 騎呢醬爆 鮮肉型男樣樣齊

【全民造星】選秀節目打造全民偶像 騎呢醬爆 鮮肉型男樣樣齊

全民造星》呢個香港版Produce101公開招募咗99位有潛質嘅男生進入比賽,但最終只會有一位勝出者成為新一代全民偶像,兼帶走100萬獎金!!!99位型男將會經過首輪淘汰,剩低嘅參賽者再會接受一連串由星級導師準備嘅特訓,目的只有一個:要培育一位有外表又有才華嘅新一代全能偶像!《全民造星》播出咗短短兩星期已經成為熱話,除咗主題曲嘅「99位陳展鵬造型」吸睛之外,參賽者嘅表演亦都受到網民關注。要出位唔一定要靠靚仔!鮮肉型男嘅參賽者當然吸睛,但亦有唔少參賽單位出奇制勝,決定以騎呢醬爆去博取評判歡心,等小編帶你哋睇下騎呢同鮮肉嘅表演單位啦!


【出奇制勝系列】17號鄧喬 嫩版醬爆 自信爆棚

「參加殘酷一叮佢贏硬!」如果要嚴選近期尷尬到唔敢睇既影片,呢條一定無得輸。鄧喬突如其來嘅除褲唔單止震撼咗成個錄影廠,仲震撼埋電視機前面嘅觀眾,成功擠進騎呢醬爆系列嘅首位。

【出奇制勝系列】13號景鴻 勇氣可嘉 其實唔差

唔係移民果個景鴻,13號景鴻嘅表演其實幾豐富。讀acting出身嘅佢唱歌跳舞演戲樣樣齊,但可能表演帶有一種微微嘅張如城感覺,所以跌咗入復活區。

【出奇制勝系列】30號阿Za 可愛賣萌嚇死人

模特兒出身嘅阿Za決定以擺pose融合唱歌表演,但係過份賣萌嘅表演加上雞仔聲嘅唱歌技巧,令到樣貌幾標緻嘅佢未能獲取評判嘅歡心,無緣晉身下一輪。

【出奇制勝系列】47號Kyle 甩beat唱說辛苦字幕組

唔啱beat加上唔知係咩語言嘅嘅rap簡直考起字幕組,從字幕黎睇,睇得出字幕組已經盡咗力。就連心美bb都忍唔住問咗一句「頭先嗰啲係咩話?」

【鮮肉型男系列】1號Stanley 高大靚仔 打響頭炮

舞蹈員出身嘅Stanley雖然第一個出場,但已經喺評判手上獲得5盞藍燈,輕鬆晉身下一輪比賽。雖然評判滿意,但係監製同一班星級導師都表示喺Stanley身上只係見到「dancer」嘅標籤,但見唔到「明星」嘅味道,唔知到下一輪佢又可唔可以改變大家對佢嘅睇法呢?

【鮮肉型男系列】11號龍志權 青靚白淨 復古表演

相信唔少人識龍志權都係因為佢係網上平台《毛記電視》嘅偽員,平時見佢玩嘢拍片就見得多,但估唔到原來唱歌佢都有一手。雖然有唔少網民批評佢仿電台style翻唱《戀愛預告》老土,但亦有唔少fans表示有創意嘅演繹方式有趣,叫佢繼續加油!

【鮮肉型男系列】18號迪迪仔 原來靚仔真係大哂

唱歌真心好一般,表演更加走埋音,但因為靚仔所以...無事~模特兒出身嘅迪迪仔令到監製、心美bb、同一班幕後工作人員都神魂顛倒,活生生演繹咗一次「靚仔大哂!」,以3盞藍燈晉身下一輪比賽。

【鮮肉型男系列】23號Anson 自信爆燈 台風取分

舞蹈員出身嘅Anson一出場已經自信滿滿,雖然唱歌一般,但係樣貌取勝,更成功冧掂心美bb,係表演完之後獲得擁抱一個,真係叫其他參加者又羨慕又妒忌!

影片來源:ViuTV授權轉載

 

節目資料
播出頻道:ViuTV99台
播出時間:逢星期一至五 (晚上9時45分至10時30分)

LOAD MORE