【女小編評新iPhone】iPhone Xs、iPhone Xs Max 及 iPhone XR 5大特點將會是女生最愛！

終於等到9月12日公佈2018年新iPhone資訊！今年新iPhone分有三個型號：iPhone Xs、iPhone Xs Max 及 iPhone XR ，蘋果迷深入了解每個新iPhone的特點，比較同舊機的分別。然而女生換新iPhone所考慮的未必如男生般專門深入，小編立即以女生角度，同各位姊妹分析三部新機有咩特點值得你換機！

1. 大Mon、細機身！

女生以往唔敢換Plus 機，因為size太大，驚單手難控制，今次iPhone Xs同iPhone Xs Max 、照顧到女生需要。iPhone Xs熒幕為5.8吋，iPhone Xs Max 為6.5吋， iPhone XR為6.1吋。雖然iPhone Xs熒幕大小同iPhone X一樣，但機身較細，無咗包邊，拎上手也較易操作；iPhone Xs Max熒幕係有史以來最大， 但機身大小卻跟iPhone 8 Plus相近。iPhone Xr 也較iPhone 8 Plus小，所以手細女生想用大Mon，唔再受機身大小所限！

▲iPhone Xs熒幕為5.8吋，售價為USD999起。

▲左邊iPhone Xs Max 熒幕為6.5吋，售價USD1099起。右邊為iPhone Xs。

▲iPhone XR 6.1吋熒幕，機身也較iPhone 8 Plus小。售價USD749。

▲今次有純金色機身，超grand！

2. 一機在手 秒變攝影高手！

女生買iPhone，最關心影相功能！今次iPhone Xs、iPhone Xs Max 最令人驚喜之處，就係有光圈調較，一機在手已可影出單反效果的不同景深的靚相，加上大家長期訓練有素的拍攝技巧，同埋新機聲稱能做到零快門延遲，相片質素具保證，post新相上Facebook 或IG呃like，一定被誤以為是攝影高手！

▲有光圈功能，簡直好似用緊單反咁！唔識影相女生至愛！

▲新iPhone具備零快門延遲功能，幫你捕捉最理想畫面！

3. 陪男友打波，唔再係啦啦隊角色！

新iPhone的相機鏡頭支援HomeCourt手機應用程式，是由香港男生林天然發明的！呢個功能可以攝錄低打波時的投籃次數，投籃位置及運動狀況。以往女友陪男友睇波或打波，都唔識欣賞，只能在場邊打氣及拍照。有咗呢個功能，女生以後有任務了！

▲偷偷話你知，呢個功能係香港男生林天然發明，梗係要撐香港人啦！

4. 雙卡槽 北上深圳旅遊更方便！

女生們周末鍾意同朋友北上玩樂，短短一天來回，實在唔會租Wi-Fi蛋，而且每隔幾星期北上一次，裝返張內地電話卡更方便。iPhone Xs設eSIM 及傳統SIM卡槽，iPhone Xs Max 及 iPhone XR也有傳統雙SIM卡槽，以後eSIM 流行時，傳統SIM卡槽就可以插入另一國家的電話卡使用，唔洗換嚟換去咁麻煩！

5. 百變女生也可靠樣解鎖！

3部新iPhone支援Face ID解鎖功能，手汗多的女生終於可以名正言順「靠樣」解鎖！即使經常轉妝、變髮型的女生，Face ID亦不受影響！

三部新iPhone 9 月 14 日起接受預訂；9 月 21 日起發售。