《POKÉMON名偵探皮卡丘》電影預告率先睇！真人版比卡超一開聲竟然係「死侍」？！

繼《小熊維尼》、《柏靈頓小熊》、《花木蘭》呢啲經典動畫卡通被翻拍成真人版電影之後，今次論到大家嘅童年回憶「寵物小精靈」啦！《POKÉMON 名偵探皮卡丘》預告喺網上正式曝光，預計會喺2019年5月前有得睇啦！各位訓練員你準備好未？比卡超，出嚟啦！

《POKÉMON 名偵探皮卡丘》預告片

究竟今次《POKÉMON 名偵探皮卡丘》係講咩？係咪真係同卡通片劇情相若？你錯啦！故事嘅主線似乎同大家熟悉嘅「寵物小精靈」唔同，因為電影其實並非改編自大家熟悉嘅「寵物小精靈」卡通，而係改編自任天堂嘅同名動畫遊戲！

正所謂「橋唔怕舊，最緊要受」，真人版電影又大玩只有主角聽得明比卡超講嘢嘅元素。每當比卡超講嘢，除咗主角之外其他人只會聽到超可愛嘅「Pika，Pika，Pika」。

 

男主角提姆由威爾史密斯（Will Amith）嘅兒子賈斯特史密斯（Justice Smith）飾演。

 

至於比卡超嘅配音......有耳朵超靈敏嘅網友一耳聽出係「死侍」嘅萊恩雷諾斯（Ryan Reynolds）！電影搵得Ryan為比卡超配音，睇嚟呢隻比卡超除咗可愛之外，都會係一隻搞鬼幽默嘅小精靈喎！

喺電影預告入面仲會見到其他小精靈，好似波波球、奇異種子、吸盤小丑、傻鴨、噴火龍等等，真係令人超期待！

 

比卡超由動畫變咗做真人版都一樣可愛！身上嘅毛髮每一條都清晰可見，製作超認真！表情更加十分豐富，無辜嘅樣子太得意啦！