如何放低七年的感情？

14 Jan 2014

Dear Joven:

你好，我跟男友剛分手一星期，我哋拍咗7年拖，而家仲未接受到，放唔低。點解我仲係放唔低，因為件事發生得好突然，分手前一星期我哋仲開開心心咁正常出街食飯，我哋仲plan咗2年後結婚，有聯名戶口儲錢，場地都搵埋，只係未book，仲同佢家人商量晒日子等等。

直至一星期前，佢無啦啦同我講覺得大家變淡咗，唔想求其結婚，覺得又結婚好大壓力，話唔想將我變咗一個好熟好熟嘅親人，事實我仍然對佢死心塌地，好愛佢，我覺得好似有啲嘢，於是約咗佢出嚟傾。出到嚟，佢先話同我拍拖期間有女埋過身，但無發生過事，佢話擔心自己日後會做對我唔住嘅事，怕自己忍唔到，如果結咗婚先咁，我會仲傷害，佢話覺得我係好女仔，唔想晒我時間，我嗰一刻簡直係覺得好似發緊夢，喊到傻咗，我無諗過喺我身邊7年嘅人會講呢啲說話。因為佢話唔係唔鐘意我，所以我話等，我可以唔結婚住，等佢ready先。但佢唔比，佢話知我恨嫁，點會咁衰要我等，如果到時佢都係唔想結，咁我點算。分手當日，佢不停安慰我，叫我唔好諗到件事咁差，話係對我好，仲話我會係佢最好最好嘅朋友，我有咩事可以搵佢，食飯都得。嗰一刻我好似比佢說服咗，覺得做朋友都無咩問題，個晚我地仲一齊食飯，仲話如果我拍拖記得話佢知，佢比我個感覺真係唔似分咗手。

之後個晚，我未諗得通，覺得佢應該仲有嘢瞞住我，於是打電話再追問，係咪有小三，佢開頭叫我唔好問，最後都認咗。原來佢一年前鐘意咗另一個女仔，個女仔仲係會好吸引佢，佢話佢地好夾，我聽完真係好傷心，點解我咁蠢竟然無發現，可能因為大家一齊時間耐咗，太有安全感。而且我一廂情願覺得自己無睇錯人，佢話自己專一同埋最憎小三，我太信佢了。之前個幾日就不停約朋友出來，不停喊，其實朋友們都好清楚，叫我唔好再搵佢唔好再等，因為大家都知其實ex 對我唔係話好好，呢7年大部分嘅嘢都係我就佢，有時仲成日罵我，不過我知道佢唔係真心。

而家諗番呢7年我就佢就到好似無咗自己咁，佢想點就咁，我無話事權。雖然朋友每日都開解我，話我值得搵個對我好啲，但我成日都控制唔到想搵佢。但每次WhatsApp佢，佢都叫我唔好咁，叫我放低，我有時係公司諗起會喊，喺街到自己一個又會喊。我快27歲了，成日同自己講要30歲前結婚生BB，就係自己俾呢句說話困住咗。

分手後我先覺得自己圈子好小，根本無地方識新男人，就算識到，我都唔知點相處。我係可以好遷就人，但係咪太過遷就先會搞到同ex 咁？而家成日想匿埋喺屋企，成日自我否定，覺得自己唔靚。（因為分手當日ex 叫我要扮靚啲，話我唔差架），對咩都零興趣，食嘢無哂胃口。每日唔想瞓醒，一瞓醒又諗起。究竟幾時先可以放低，我成日叫自己要憎佢，如果唔憎就忘記唔到。但我真係做唔到。我覺得真係好辛苦……當我頂唔住，我就搵朋友傾，但其實佢地講嘅嘢我都明，但就係做唔到。

我覺得而家我只可以自己幫自已，好想好想放低，但偏偏成日諗起佢，點算？

From無助的M