有啲愛情關係,其中一方經常付出,而另一方似乎只需付出少少。瘋狂付出嘅一方有時會自嘲自己梗係前世欠咗佢,不過講笑還講笑,如果心裏面積積埋埋啲情緒屈住屈住,長期嚟講對大家都冇好處架!
其實唔使研究前世今生,都解釋到點解有人好似奉旨要你就晒佢咁,原因包括:
登入 瀏覽文章可賺取積分

1. 佢以為你點都會對佢好,唔會唔理佢。
2. 你好多時都會諗咗人哋先至諗自己,對咗人好又唔想邀功。

3. 喺你嘅生活中,戀愛佔咗好大部分,完全牽制住你嘅喜怒哀樂。
4. 佢唔知你有唔開心。

如果佢唔係利用你嘅愛、唔值得你愛嘅衰人,想段感情健康發展,就要做啲嘢去平衡返:

1. 對咗佢好要俾佢知,攞返credit!用平常語氣、溫柔語氣、講笑語氣都得,總之唔好暗啞底喺度做,等佢知道。

2. 話俾佢知你想佢點樣鍚你,如果佢唔識主動做,就自己主動俾機會佢做,例如久唔久請佢幫你做啲嘢。

3. 唔開心?!自己想點,要同對方講,宜家唔方便講、唔知點講嘅話,可以返去消化下先,以後再同佢講,唔好收收埋埋。

4. 建立個人興趣、其他生活圈子,分返啲精神喺家庭、朋友、嗜好等其他方面。

溫馨提示:
唔係叫你事事計較 / 乜都計住計住,只係如果你係瘋狂付出而覺得唔開心嘅話,就要好好做啲嘢去平衡返啦。