《逆緣》係港版美國隊長？拆解「解凍阿爺」陳家樂究竟係邊個？

如果唔係《逆緣》，大概大家都唔係好記得陳家樂，又或者較有印象，就係佢係余香凝個男友。話說三年前因為拍港台劇集認識余香凝，之後拍拖至今，仲開到聲經已認定對方係結婚對象，計劃5年內拉埋天窗。

講番陳家樂本人，佢係2003年英皇新秀入行！嘩，2003年有邊個參賽呀，冠軍係William Chan陳偉霆呀，雙陳對決之下，陳家樂輸咗都冇法子啦！

入得英皇，梗係有唔少機會。就算唔跳舞唔唱歌，都大把戲拍啦。十年前先喺TVB拍咗《盛裝舞步愛作戰》，話晒都係第二男主角，劇中仲同當年冒起嘅趙碩之做情侶。點知年少氣盛，覺得自己好掂，之後拍電影《很想和你在一起》（與洪卓立、詩雅主演），幾乎唔跟劇本咁演，最後冇人再搵佢拍嘢，投閒置散，直至麥曦茵搵佢拍《DIVA華麗之後》，差唔多雪咗3年先解凍。

即使解凍，都唔代表陳家樂有運行，繼續介乎半紅不黑與不紅好黑之間。好似林超賢導演嘅單南電影《破風》，超大型運動電影，集合中台韓型男，分別有竇驍、彭于晏、崔始源，而香港嘅代表就係陳家樂！點知佢拍拍下又炒車，胸骨骨折，角色又唔討好，相信而家都冇乜人記得。