一定要BOOKMARK!五大超靚蜜月酒店推介

一定要BOOKMARK!五大超靚蜜月酒店推介

新年新精頭,拜年果陣,係咪比人問咗廿次:幾時結婚、幾時派利是先?不如趁住新一年付諸實行。
搞結婚咁煩,其實我淨係對度蜜月有興趣。推介你以下五間超靚嘅海外酒店,由日本到泰國,由馬爾代夫到峇里島,梗有一間啱你心水。

By COSMO

1. 峇里 一生人一次海景

無論峇里島每年有幾多新酒店開張,Alila Villas Uluwatu地位都係無可取替。佢位於峇里島南邊,鳥瞰海邊懸崖絕景,最爽係坐喺當地特色嘅 Sunset Cabana發呆亭,吹住海風,睇住日落,喪Hea放空,人生一大樂事也。

而每間房都係別墅Villa,有埋私人泳池,夠晒寬敞同私密,適合情侶。又有蜜月套餐,甚至有場地搞結婚,唔怪得個個名星都嚟。一晚索價$5400起,住完一晚,絕對認同一生人值得豪一次。

2. 峇里 世界第一泳池

去峇里除咗望吓海,望吓山都大滿足。呢間酒店叫Hanging Garden of Bali,位於峇里Ubud,自喻為七星級酒店,山林青翠,風景極靚。最出色係泳池,係一個雙層嘅infinity pool,四周被叢林包圍,打卡一流,難怪喺IG咁紅。地理位置稍遠,但係值得咁遠嚟嘅。

3. 輕井澤 豪住日式旅館

如果唔特別喜歡陽光與海灘,去日本都唔錯。不如今次都試吓日本貴價酒店星野旗下嘅 Hoshinoya,最推介係輕井澤一間,是高級的溫泉旅館,提供高質素的一泊二食,房間有私人風呂,面向河景泡溫泉,夠嘆。到訪期間,可順道遊輕井澤「高原教堂」、「石之教堂」等等,浪漫寫意,超適合新婚蜜運。

4. 馬爾代夫 潮爆海底餐廳

論價錢,馬爾代夫應該都屬於度蜜月級數。Water Villa直通大海、對海狂做spa、無人海灘燭光晚餐,相信無人能夠抗拒。再要點新意,向你推介Conrad Maldives Rangali Island,不但有齊以上種種配套,更有全世界第一座海底餐廳,水底五彩繽紛的景色盡收眼底,度蜜月才能有雅興慢慢玩。 

5. 蘇梅 新開靚酒店

假期短, budget有限,不如考慮去泰國蘇梅島度蜜月。早幾個月,Ritz Carlton在蘇梅開了第一家酒店,海景、私人沙灘、勁靚spa room一應俱全。而且它活動較多, 瑜珈館、泰拳班、衝浪、帆船、划艇、浮潛等等咩都有齊,較適合精力充沛的新婚夫婦。而且與以上四間比較,呢間Ritz Carlton Samui價錢門檻相對低,划算!

LOAD MORE